Ýurdumyzyň iň gözel künjekleriniň birinde, ýagny ak mermerli Arkadag şäherinde Türkmenistanyň mukaddes Garaşsyzlygynyň şanly 35 ýyllyk baýramy mynasybetli yzygiderli geçirilýän baýramçylyk çäreleri giň gerime eýe bolýar. Düýn Arkadag şäheriniň häkimliginiň we Türkmenistanyň Kärdeşler arkalaşyklarynyň Arkadag şäheriniň birleşmesiniň bilelikde gurnamagynda Gurbanguly Berdimuhamedow adyndaky çagalar sagaldyş-dikeldiş merkezinde şanly baýramçylyga bagyşlanan "Garaşsyzlyk – pederlerimiziň köňül arzuwy" diýen at bilen tegelek stoluň başynda täsirli söhbetdeşlik geçirildi. "Arkadag" teleýaýlymy tarapyndan ýazgy edilen bu gepleşik şanly senäniň ähmiýetini we ýurdumyzyň gazanan üstünliklerini aýdyň görkezmäge gönükdirildi.
Geçirilen çäräniň dowamynda çykyş edenler Garaşsyzlygyň türkmen halkynyň taryhynda tutýan ornuna, milli döwletliligiň berkemeginde gazanylan üstünliklere aýratyn ünsi çekdiler. Söhbetdeşlige gatnaşyjylar pederlerimiziň asyrlarboýy edip gelen mukaddes arzuwynyň wysaly bolan Garaşsyzlygyň beren miweleri, ýurdumyzda durmuşa geçirilýän beýik özgertmeler dogrusynda giňişleýin durup geçdiler. Hususan-da, geljegimiz bolan çagalaryň sagdyn, berk bedenli we ylymly-bilimli bolup ýetişmekleri üçin Gahryman Arkadagymyzyň we Arkadagly Gahryman Serdarymyzyň amala aşyrýan yzygiderli aladalary aýratyn bellenildi. Duşuşygyň geçirilen ýeri bolan Gurbanguly Berdimuhamedow adyndaky çagalar sagaldyş-dikeldiş merkeziniň döwrebap şertleri hem bu aýdylanlaryň aýdyň subutnamasy hökmünde görkezildi.
Täsirli pursatlara baý bolan gepleşigiň ahyrynda oňa gatnaşyjylar döredilýän şeýle giň mümkinçilikler hem-de şertler üçin türkmen halkynyň Milli Lideri Gahryman Arkadagymyza we hormatly Prezidentimiz Arkadagly Gahryman Serdarymyza tüýs ýürekden çykýan hoşallyk sözlerini beýan etdiler.
Ogulnar Baýramowa,
Türkmenistanyň Kärdeşler arkalaşyklarynyň Arkadag şäheriniň birleşmesiniň pudagara utgaşdyryjysy.
